Aktiv omsorg; fysisk aktivitet og naturopplevingar i helsefremjande arbeid, vidareutdanning

På bakgrunn av forsking og statleg satsing innan fysisk aktivitet og helse, skal vidareutdanninga i aktiv omsorg møte desse utfordringane gjennom å leggje vekt på fysisk aktivitet og natur- og friluftsliv som helsefremjande faktorar. Dette er aktivitetar som kan bidra til betre fysisk og psykisk helse, førebyggje sjukdom og funksjonstap, fremje sosial kontakt, gje positive opplevingar generelt og gje auka meistring i kvardagen. Føremålet med studiet er å imøtekome behovet for auka kompetanse i fysisk aktivitet og friluftsliv som helsefremjande faktorar blant yrkesgrupper, som planlegg eller yter omsorgstenester innan den kommunale helse- og sosialtenesta og i spesialisthelsetenesta.

Etter gjennomført studium skal studenten:

- ha innsikt i betydinga av fysisk aktivitet og friluftsliv som helsefremjande faktorar for menneske med behov for langvarige omsorgstenester

- ha forståing for kva eit aktiv liv har å seie for livskvalitet og helse

- kunne planleggje, setje i verk og leie tiltak og prosjekt som stimulerer til fysisk aktive brukarar

- kunne stille seg kritisk til, og reflektere over eigen praksis

Dei to emna i vidareutdanninga kan saman, eller kvar for seg gå inn som valfrie emne i det helse- og sosialfaglege mastergradsstudiet Meistring og myndiggjering ved Høgskulen i Volda. Dei to emna går òg inn som to av fire emne i Vidareutdanning i miljøterapi.

Personar med treårig utdanning på høgskulenivå eller tilsvarande, som ynskjer å ta vidareutdanning for å auke kompetansen på aktiv omsorg i arbeid med menneske med ulike behov.

Det generelle kravet for å bli tatt opp til vidareutdanninga er treårig utdanning på høgskulenivå.

- Bachelorgrad, eller tilsvarande, i helse-, sosial-, eller idrettsfag.

- Allmennlærarutdanning

- Andre med minimum tre års høgare utdanning, eller tilsvarande, med relevant fagsamansetning og eit større skriftleg fordjupingsoppgåve, kan etter vurdering bli tatt opp.

Aktiv omsorg; fysisk aktivitet og naturopplevingar i helsefremjande arbeid er ei vidareutdanning på 30 studiepoeng. Den er bygd opp av to emne på 15 studiepoeng: MT 500 Omsorgsprofil med vekt på fysisk aktivitet og friluftsliv og MT501 Fysisk aktive brukarar. Kvart emne har tre samlingar à fire dagar ved Høgskulen i Sogn og Fjordane.

Undervisninga er lagt opp med ein kombinasjon av førelesingar, aktivitetar, arbeid i grupper og seminar med rettleiing. I tillegg skal studenten gjere arbeidsoppgåver mellom samlingane. Fronter vert nytta som elektronisk læringssystem.

Ingen

Høgskulen organiserer ikkje studieopphald i utlandet.

Arbeidskrav er obligatoriske oppgåver som må vere greidd før ein kan framstille seg til eksamen. Det inngår arbeidskrav i begge emna. Emneomtalane gjev nærmare omtale av dei ulike arbeidskrava.

Eksamen/sluttvurdering blir vurdert med bokstavskarakter etter ein skala frå A til F. A er beste karakter og F betyr ikkje greidd. Kvart emne har avsluttande eksamen, emneomtalane gir nærmare omtale av sluttvurderinga. Alle eksamenar vert vurdert av to sensorar og har ekstern sensur.